ek sit met ‘n droom in my hart
om weer in Israel se strate in U voetspore te loop
om weer deur die tuin van Getsemané te stap
en te weet U voete het hier geloop
Here, dit was ongelooflik
om eeue later te weet: U was ook hiér
hier in die tuin van Getsemané
het U my ook gewys dat ek
verlos sal word van die
wêreldse dinge wat my gevange hou

om weer ‘n bootvaart te beleef
op die See van Galilea
en te weet: hiér het U die storm stilgemaak
soos U ook die storms in my hart stilmaak

om weer die Vallei van Ela te besoek
en te besef U is groter as
die Goliats in my lewe
my 5 klippies lê op my rakkie
om my te herinner

U, my Vader, is groter as groot

om weer die bad van Betesda te sien
en te weet U maak bemoeienis
met my, want hier het U vir my
‘n persoonlike boodskap gegee

om weer in die Wildernis van Judea
te staan, oor die woestyn te kyk
en te weet: hiér was U deur Satan versoek
en Here, hier het ek ‘n streep
in die sand getrek en gesê:
tot hier toe en nie verder nie

om weer Pilatus se verhoorsaal te besoek
en te besef: hier was U onskuldig verhoor,
gevange gehou, vasgebind, sonder kos en water
alleen . . . in ‘n donker diep gat

om weer in Israel op Golgota af te kyk
te weet hier het u aan ‘n kruis gehang
met die besef dat U dáár U
laaste asem uitgeblaas het … vir mý
as die kruis kon praat
sou ek besef dat dit nie
net ek is wat soms van
God verlate voel nie

sou ons hoor hoe U vra
my God, my God, waarom het U my verlaat?

as die kruis kon praat
sou ek my kop
in skaamte laat sak
soos die dag toe ek
U om vergifnis gesmeek het
en my hart onherroeplik aan U gegee het

as die kruis kon praat
sou ek weer hoor: jou skuld,
my kind, is vol betaal

© Surene Esterhuizen

The post as die kruis kon praat appeared first on Vat 'n blaaskans / Take a break.

Saterdagmiddag kyk ek ‘n fliek op TV – Ben Hur. Romeinse tipe agtergrond en dan is daar ‘n paar, amper onbeduidende stukkies in die fliek oor Jesus, waar mense bewus gemaak word van hoe Hy dinge anders doen. Die goedheid in Hom en almal praat daaroor. Maar die fliek gaan hoofsaaklik oor ‘n vriend wat sy beste vriend verraai het en hy eindig toe vir 5 jaar op as ‘n roeier op ‘n galleiskip. Intussen kom die twee gewese vriende toe nou weer by mekaar uit en wraak is die hoofgedagte.

Amper op die einde van die fliek het die Romeinse heerser Jesus laat arresteer en daar is ‘n kruisigingstoneel.

Ek wens ek kan vir enige iemand verduidelik presies hóé my binneste gevoel het toe ek daardie toneel sien. Hoe dit gelyk het met die Man aan die kruis, die spykers deur Sy hande, die bloed wat drup en later vloei teen die houtkruis af. Die wreedheid van dit alles!! Die emosie wat deur my gaan terwyl ek hierdie toneel kyk en die trane loop en ek weet net weereens: ek móét eenvoudig net volgende jaar Israel toe gaan. Ek móét die geleentheid hê om te kan loop waar Hy geloop het.

Waarvoor is ek vandag dankbaar? DANKIE, GOD, dat U Seun Jesus vir my kon sterf aan daardie houtkruis! Dat U my goed genoeg geag het sodat Hy dit vir my kon doen! Dankie dat U tóé lank voordat ek ‘n gedagte was, rééds met my bemoeienis gemaak het en dit vandag steeds doen.

Dankie, Abba Vader! Dankie! Dankie! Dankie vir U liefde vir mý feilbare, onperfekte, ongehoorsame kind! Ek het u lief!

The post Dag 7 – 125 van dankbaarheid appeared first on Vat 'n blaaskans / Take a break.