Die pad na ware wysheid – 366 Dagstukkies deur Lizette Murray

ISBN 978-0-7963-2309-5 ~ Lux Verbi ~ R290-00

Ek is dol oor kompetisies en wanneer daar een op sosiale media opduik, dan neem ek deel en raai wat? Die keer was ek die gelukkige wenner van Lizette Murray se dagstukkie boek om mens op die ware pad na wysheid te lei.

Daar is geen towerformule om wysheid te bekom nie. Dit vra ʼn leeftyd se dag-tot-dag-toewyding en soeke na die ware wysheid. Dit vra dat ons met ons oor op die grond sal leef, in afwagting op God se stem wat ons leer hoe om ware wysheid – die wysheid wat van Hom kom – te verkry. In hierdie 366 dagstukkies neem bekende skrywer Lizette Murray ons hand en lei ons na Hom toe, die bron van Wysheid, en help ons om met wysheid te leef, in ons alledaagse bestaan.

Elke maand het ‘n tema: Die soeke na ware wysheid, Wysheid – ‘n helder lig, Vat my hand, Ware Noord, Rentmeesters – om maar net ‘n paar te noem.

Nou wonder ek: sal ek nou wag tot Januarie 2024 om met die boek te begin, of sal ek sommer op 1 Oktober 2023 begin? Ek is maar ‘n ongeduldige entjie mens en ek hou nie van wag nie. Ek steel-kyk dus gou so ‘n bietjie …

15 Januarie – Ek bid sommer op my fiets.  Ons almal moet bid. Soms raak ons so besig ons dink ons het nie tyd om stil te sit en te bid nie. Dan bid ons sommer so in die hardloop … ek bid soms in my motor op pad werk toe of wanneer ek die lang pad aandurf na een van my naweek retreats. Dan het ek en my Vader sommer lekker lang gesprekke. Hoekom doen ek dit? Want God is oral en altyd beskikbaar om te luister.

Ek loer nog, maar besluit ek wil nie te veel weggee nie. Dis regtig ‘n ongelooflike boek om in die hande te kry. Oktober is my verjaardag-maand en ek dink ek gaan tog maar daar begin lees.

Wat sê Oktober se voorwoord? Ek haal so ‘n sin of drie aan: Die lewe is ‘n oefenskool. Om voluit te kan leef moet ons paraat wees. Ons moet leer hoe om ontfermend en versoenend te leef. God het sy Heilige Gees gestuur om elke dag saam met ons te stap en saam met Hom die lekkerte van elke tree te ontdek.

Ek is alles behalwe die perfekte mens. Daarom is dit vir my belangrik om na die beste van my vermoë te probeer om ‘n verhouding met my Vader te hê, maar ons is almal menslik – probeer om self ons dinge uit te sorteer en wanneer ons nie slaag nie, dan wil ons na God hardloop en HELP skree. Soms is ons so verwaand (entitled) dat ons dink ons kan sommer vir ander mense ook raad gee.

Ek glo dat Die pad na ware wysheid sal ons mensekinders so ‘n bietjie kan help om wysheid te bekom of ten minste te erken dat ons hulp nodig het om wel wysheid te bekom. Kry joune en ons word saam wys.

Jy kan dit aanlyn bestel of by jou naaste boekwinkel koop.